Thursday, January 12, 2012

വെടിയുണ്ടകള്‍

വെടിയുണ്ടകളെ നേരിടാമെന്നതായിരുന്നു മുഖ്യ അട്രാക്ഷന്‍ ! അങ്ങനെയൊക്കെ സന്തോഷം കിട്ടുമെങ്കില്‍ അതുംകൂടി ആയിക്കോട്ടെന്നു കരുതി. സന്തോഷത്തിനു കുറവുണ്ടായിട്ടൊന്നുമല്ല . ആനന്ദതുന്ദിലരായി ഞങ്ങള്‍  അങ്ങനെ ജീവിച്ചു വരികെയാണ് 'മുഖ്യഗുരു' പറഞ്ഞതോര്ത്തത് , എന്തിന്റെയും വക്കില്‍ കൂടി നടക്കുമ്പോഴേ ആസ്വദിക്കാനാകൂ എന്ന്. അപ്പൊ തീരുമാനിച്ചു 'വെടിയുണ്ടയല്ലാതൊരു ലക്ഷ്യവുമില്ലിനി' എന്ന്.  അങ്ങനെ ഉള്ളതെല്ലാം കേട്ടിപ്പറക്കി പുറപ്പെട്ടു . ഒടുവില്‍ മനസ്സിലായി. അവിടെയും കടുത്ത കൊമ്പറ്റീഷന്‍ ആണെന്ന്. വെടിയുണ്ട ഉണ്ടാക്കി കൊണ്ട് വന്നു നേരിടാന്‍ പോലും തയ്യാറായി ആളുണ്ട് . അല്ലാതെ വെടിയുണ്ട എല്ക്കണമെങ്കില്‍ ചിലപ്പോള്‍ ഒരു ദശാബ്ദം കാത്തിരിക്കേണ്ടി വരുമത്രേ! അതും വല്ല മാനിനെയോ മയിലിനെയോ നോക്കി വെച്ചവ ലക്‌ഷ്യം തെറ്റി വന്നു കൊള്ളണം. വയസ്സുകാലം വരെ കാത്തിരുന്നു ഒരു വെടിയുണ്ട കൊണ്ട് പണ്ടാരമടങ്ങിയിട്ട് എന്തോന്ന് ലാഭം!

Thursday, December 29, 2011

ഇരുട്ടിന്റെ പക്ഷികള്‍

ഓര്‍മകള്‍  എന്റെ രോഗമാണ് .
ചുറ്റിലുമത് സംക്രമിപ്പിക്കുന്ന
വാഹകയുമാണ് ഞാന്‍ .

അവളോട്:
അയലത്തെ വീട്ടിലെ ചെറുക്കനെ
നെടുകെ പിളര്‍ത്തി
സ്കൂള്‍ തൂണില്‍
ചാരി വച്ചിരുന്നതിനെപ്പറ്റി .

ഭക്തി സീരിയലുകളിലെ ജരാസന്ധനില്‍ നിന്നും പ്രചോദനം.

അവന്‍ ചെളിവെള്ളം തെറിപ്പിച്ച്
മുന്നിലേക്കോടുമ്പോള്‍ ,
മറന്നു വെച്ച അവനെയെടുക്കാന്‍
ഞങ്ങള്‍ സ്കൂളിലേക്ക് തിരിഞ്ഞോടി.

ഒരു വെള്ളിയാഴ്ച
പുസ്തകസഞ്ചി മറന്ന് സ്കൂളിലെത്തിയ
ഉച്ചനേരത്തെപ്പറ്റി.
പഞ്ഞിക്കിടക്കയില്‍ തലകുത്തി
മറിയവേ തിരിച്ചറിഞ്ഞ
ഉരസുമ്പോള്‍ തീപാറുന്ന
ശരീരങ്ങളെപ്പറ്റി.

ബാല്യത്തിന്റെ പുതപ്പിലെക്ക് ചായാന്‍
അവള്‍ കൂട്ടാക്കുന്നില്ല.
അഞ്ചും രണ്ടും വയസ്സുള്ള കുട്ടികള്‍ക്ക്
ഓര്‍മകള്‍ നെയ്യുന്ന തത്രപ്പാടിലാണവള്‍ .

അയാളോട്:
തുര്‍ക്കിഷ് നീല നിറമുള്ള
കൈപ്പടയില്‍
ചുംബിച്ചിരുന്നതിനെപ്പറ്റി,
ഏടുകള്‍ എത്ര മറിഞ്ഞു!
ദിനംപ്രതി മങ്ങുന്ന നിറങ്ങളെ
വിശ്വസിക്കാനുമാവില്ല .

ബ്രാന്റ് നെയിമറിയാത്തൊരു  സുഗന്ധം,
എത്ര പ്രിയപ്പെട്ടതായിരുന്നുവെനിക്കത്!
ഓര്‍മകളില്ലാത്തവര്‍ക്ക് മുന്നില്‍
അവരുടെ ഒഴിഞ്ഞ സുഗന്ധക്കുപ്പിയെ വര്‍ണിക്കുക
അശ്ളീലം തന്നെയാണ്.

ആ പക്ഷികള്‍ അങ്ങനെയാണ്,
അവ പറന്നു പോകുമ്പോള്‍
ഇരുട്ടിന്റെ നിറമുള്ള സുഷിരങ്ങള്‍ ശേഷിപ്പിക്കും.
അതില്‍ നിന്നും പിറക്കുന്ന   പക്ഷികള്‍
പകലിരവുകളില്‍ ഭീതിദമായി  ചിലയ്ക്കും.

Sunday, December 4, 2011

ആധിമദ്യാന്തം

'ആധിമദ്യാന്തം' എന്ന് ചാനല്‍ സ്ക്രോള്‍ . അങ്ങനെയൊരു വാക്കിനെക്കുറിച്ച് ചിന്തിക്കാവുന്നതാണ്. ഇന്ന് ബാര്‍ ക്ളോസ് ചെയ്തുവെന്നു വിനീതനായ ബെയറര്‍ അറിയിക്കുമ്പോള്‍ ഉണ്ടാകുന്ന ആധിയെന്നോ മറ്റോ അര്‍ത്ഥം കല്‍പ്പിക്കാവുന്നതാണ്‌  .

Monday, July 18, 2011

i deserve

ഞാന്‍ ദൈവത്തോട് പറഞ്ഞു : ഇതിലുമധികം സ്നേഹം ഞാന്‍ അര്‍ഹിക്കുന്നുവെന്ന്,
ദൈവം പറഞ്ഞു, "ഞാനുമതേ, ഞാന്‍ ആരോട് പറയും?"

Tuesday, June 7, 2011

കവചം

മിക്ക മനുഷ്യരും അഭേദ്യ മായ ഒരു കവചം ധരിച്ചിട്ടുണ്ട്. മതവിശ്വാസ മോ , വക്കുതേഞ്ഞ ഒരു കഷണം തത്വചിന്തയോ , ഗതകാലത്തില്‍ നിന്നുമുള്‍ക്കൊണ്ട ഒരു അനാവശ്യ പാഠമോ, ഇനിയും കണ്ടു പിടിക്കപ്പെട്ടില്ലാത്ത മറ്റെന്തെങ്കിലുമോ കൊണ്ടാണ് ആ കവചം നിര്‍മ്മിച്ചിരിക്കുന്നത്. ഒരുപക്ഷെ ആത്മരക്ഷയ്ക്ക് വേണ്ടിയാകാം അത്. പലര്‍ക്കും അടുത്തേക്ക് നടക്കുമ്പോള്‍ ഒരു ചില്ല് പാളിയില്‍  തട്ടിയെന്നോണം എനിക്ക് തടഞ്ഞു നില്‍ക്കേണ്ടി വന്നിട്ടുണ്ട് . എത്രയധികം ആഗ്രഹിച്ച് നാം കണ്ടെത്തുന്ന ഒരു സൌഹൃദത്തില്‍,  പ്രണയത്തില്‍ , പേരില്ലാത്ത ഒരു  മനോഹരമായ ബന്ധത്തില്‍  ഈ മനോകവചം അസ്വാഭാവികതകള്‍ സൃഷ്ടിക്കും.എന്നാല്‍ അപരന്റെ വ്യക്തി സ്വാതന്ത്ര്യത്തെ അംഗീകരിക്കുകയെ മാര്‍ഗ്ഗമുള്ളൂ!

Friday, February 4, 2011

prathikaranam

എന്നിലെ നിസ്സഹായയായ സ്ത്രീയാണ് ഏറ്റവുമധികം പ്രതികരണശേഷി കാണിക്കാറുള്ളത് , പ്രതികരിക്കാതിരിക്കുക എന്ന ബുദ്ധിപൂര്‍വ്വമായ മാര്‍ഗ്ഗം പ്രയോഗിക്കാന്‍ കഴിയാത്തത്ര നിസ്സഹായയാകുമ്പോള്‍ ആ ദയനീയതയാണ് ഒരു പക്ഷെ പ്രതികരണമായി പുറത്ത് വരാറുള്ളത്. അതെങ്ങനെ ധീരതയായി കണക്കാക്കാനാകും?

Thursday, December 2, 2010

പഴയ ചെകുത്താന്‍

പഴയ ചെകുത്താനൊരു കോട്ടയുണ്ട്,
വിമൂകവും ധൂസരവുമായ ഒന്ന്.
പാര്‍പ്പു തുടങ്ങിയതെന്നെന്നോ,
എന്തിനെന്നോ,
അവനു നിശ്ചയമില്ല.
അതൊരു ശിക്ഷയുടെ ഭാഗമല്ലെന്നും,
തന്റെ രാജ്യമതെന്നുമാണ്,
അവന്റെ മതം.
'പഴയ ചെകുത്താന്‍ ' എന്നു  ഭിത്തിയില്‍ കണ്ട് ,
താനൊരു ഭയങ്കരന്‍ തന്നെയെന്നോര്ത്ത് തലയാട്ടും.
അപ്പോള്‍ വേഷം മാറി പുറപ്പെടും.
എന്തു ഫലം?
മനുഷ്യന്റെ വിരുദ്ധ വികാരങ്ങളുടെ,
രക്തത്തിന്റെ, വിയര്‍പ്പിന്റെ,
നിസ്സഹായതയുടെ,ആത്മ വിശ്വാസത്തിന്റെ
ഗന്ധമേറ്റവന്‍ ,
സംഭീതനായി തിരിഞ്ഞോടും.
കോട്ടയുടെ വിജനതയെ സ്തുതിച്ചും,
'പഴയ ചെകുത്താന്‍ ' എന്ന തന്റെ നാമത്തില്‍
അഭിമാനം പൂണ്ടും തുടരും.